霍汶希自爆已為人母 爸爸為內地富商

抵買媽媽

今日有報道指，英皇金牌經理人、現任北京英皇副總裁和香港英皇藝員部及唱片部總監霍汶希(Mani)，向傳媒直認已為人母，女兒Honey(暱稱)今年九月要上幼稚園。至於BB爸爸，則是內地富商，身份神秘，只知個子高大，生意遍及海外，外形穩重，據報道形容為「有懾人的威嚴」。Mani表示2011年與這名商人男友分手、結束兩年情，豈料卻於分手後發現自己懷孕。

Mani在訪問中透露，發現懷孕，覺晴天霹靂，但生兒育女是其夢想，而男方亦表示願負責任，但Mani認為兩人性格不合，相處如火星撞地球，故最後決定獨力照顧BB，並決定放大假，到美國安胎。2011年，Mani向英皇二度請假赴美留學，就是這個原因。孖生妹妹Noven亦有同行。

Mani表示，當時真係去咗報讀英語校外課程，日日返學，但天氣越來越凍，路亦難行，加上荷爾蒙變化好大，令Mani情緖不穩，幸好佢同自己講﹕「為咗個女，點都得﹗」終於捱過。至於分娩當日，重提此事Mani仍猶有餘悸。佢話當時係半身麻醉，所以成個過程係清醒，仲感到醫生不停按住佢個肚，幸好胞姊一直陪同在側。



做咗未婚媽媽已有兩年，不少圍內朋友都知道。囡囡Honey亦已由北京搬咗返香港定居。Mani自言今次決定向傳媒承認未婚生女一事，係希望可以大大方方拖住囡囡返學，唔想再避忌。

Mani喺訪問中表示，女兒出生之初，一直留喺北京，而佢嘅事業重心，亦轉咗去北京。原來一切都係為咗女兒。Mani話，囡囡出世後，經濟負擔重咗，所以佢主動向英皇提出北上發展，亦方便照顧女兒，令女兒喺一個不受打擾環境下長大。

但係萬料不到，北京唔止氣候唔啱，水土不服，更令Mani卻步，是醫療方面的問題，更令女兒喺8個月大嗰陣，陷於生死一線驚恐之中。

事緣係Honey8個月大嗰陣，有日發高燒，於是去咗當地嘅兒童醫院求診。Mani憶述當時好多病人，護士竟然叫佢哋一個鐘之後返嚟，於是Mani就帶個女出去食嘢。但外面實在太凍，Mani家姐緊緊抱住Honey令佢唔好凍親。一個鐘之後返到醫院，Honey已經抽筋昏迷，眼仔張開，但完全冇反應，嚇到Mani同家姐發狂。Mani說﹕「睇住醫生立即幫個女打針同戴上氧氣罩，我就成身震晒，個腦不停諗，呂就咁樣冇咗佢？」強悍硬淨如Mani，此刻亦眼淚決堤。

幸好上天眷顧，女兒平安無事。但醫生話因為Honey曾經發高燒抽筋導致腦缺氧，日後發高燒嗰陣，有可能會再出現呢種情況，故Mani決定帶女兒返港生活，但Mani嘅工作陣營，仍然喺北京，母女惟有分離。  

抵買媽媽