巨聲幫劉威煌喪嗲女友

rivaldo0303

劉威煌09年參加咗第一屆《超級巨聲》，之後以巨聲幫身份成為無綫電視藝人同歌手，唔經唔覺都入行差不多4年，發展叫做不過不失。前晚情人節8點幾，劉威煌拖住女友同另一位男友人喺銅鑼灣行街。





Fans求合照
佢哋漫無目的行咗一陣就去咗白沙道間太平館食飯，三個人叫咗三款食物分嚟食，一路食一路玩手機嘅劉威煌仲頭側側咁嗲女友，不過留心聽佢哋原來用普通話交談。食咗差不多一個小時就離開，跟手佢哋行咗過去世貿方向，沿途劉威煌都蹺住女友行好鬼溫馨。其間可能劉威煌染咗綠色嘅頭太搶眼，好多fans都認出呢位巨聲幫嘅身份，前後有幾位少女都要求影合照，佢全部冇托手踭。

去到專線小巴站，劉威煌送完女朋友上咗架去數碼港嘅小巴之後，佢同位男性朋友即刻急急腳入咗間便利店，之後就鬼鬼祟祟行咗去後巷。原來佢哋煙癮起又怕俾人見到，所以急急腳去後巷偷偷哋煲煙，食完煙之後佢哋就去咗坐港鐵。

採訪：徐錦池、陳辰
攝影：羅德光、梁繼光

■情人節劉威煌蹺實女友喺銅鑼灣行街。

■送咗女朋友上車，劉威煌同男友人靜雞雞去咗後巷煲煙。

■一頭綠髮嘅劉威煌好搶眼，喺街邊俾fans捉住影相。