李力持數臭嘉穎有價冇市

rivaldo0303

近日為內地劇《江南四大才子》做後期工作的導演李力持，昨日接受電台訪問時狂插原本是選角之一的鄭嘉穎，力數他人品、普通話差及經常改劇本，又寸爆他在內地叫價高，實則有價冇市。不過，鄭嘉穎昨回應「睇完劇本之後就推咗」，似暗寸李力持劇本差。

李力持昨接受新城訪問，透露將赴北京為其執導的內地劇《江南四大才子》做後期，語畢即開名寸爆鄭嘉穎。李力持說：「家炒到熱哄哄話鄭嘉穎幾十萬（接內地劇）、林峯又幾十萬，我覺得你叫價啫，搵套戲嚟拍吓先，家係咪鄭嘉穎No.1？我有少少懷疑，鄭嘉穎都係得一套啫（內地hit的劇），係香港炒作，喺內地聽番嚟完全唔同，香港演員嘥氣啦，講廣東話邊攞到咁高價。」

李力持指劉愷威在內地拍戲多年，現時都要找中央戲劇學院退休教師教講普通話對白，他說：「亂咁叫價無謂，練好先啦，但係林峯50萬就梗係堅，無綫話，唔通唔信咩？」是否覺得鄭嘉穎普通話不行？他說：「你問吓佢先，我只係知佢成日話要改劇本，練好普通話先啦，同內地劇組能夠打成一片先。」李力持表示未與嘉穎合作過，原本《江》劇選角有找過他，不過他檔期有問題而轉找劉愷威演出。是否聽聞嘉穎工作態度不好？他說：「周星馳我都唔怕，幾時怕你鄭嘉穎，你鍾意改咪坐低慢慢改，但改劇本唔只係演員話事，有投資方、編劇等等，如果係孫紅雷就得。」

■鄭嘉穎近日被傳拍攝內地劇《葉問2》酬金每集漲價到50萬人民幣。劇照

■內地劇《江南四大才子》中劉愷威所演角色原來最初意屬鄭嘉穎，旁為張儷。劇照

嘉穎暗指劇本唔掂

談到近日被王晶和田啟文狂插的周星馳，李力持說：「我懷疑佢（指周）自己炒作，佢一有新戲就炒作，冇新戲就匿埋。」可覺星爺為人孤寒？他說：「孤寒唔緊要，咁先有才華，個人要無良度啲嘢先好笑。」
對於李力持狂數，身在法國的鄭嘉穎昨在電話中回應說：「李導演舊年係搵過我拍《江南四大才子》，但我睇完劇本之後就推咗。」似暗寸李力持的《江》劇劇本差。嘉穎續說：「過往搵過小弟拍戲嘅，就算今次拍唔成，下次佢哋都會繼續再搵番嘅，托賴都未停過。」


採訪、攝影：溫敏芝

羅渣爸爸

叫價啫~