朱薰誕6.8磅B仔

rivaldo0303

樂隊Mr.前晚在紅館完成一連兩場演唱會，成員Dash即場宣佈孖生細佬阿榮和商台DJ朱薰的B仔前日順利出世，重6.8磅。Mr.率領全場觀眾合唱《感動》祝賀一家三口，剛巧Dash和阿榮昨日生日，可謂喜上加喜，而主音Alan昨日已率先到醫院探望小榮。

一連兩場的Mr.紅館演唱會前晚完成，與此同時，成員Dash的孖生細佬阿榮也榮升老竇，他跟朱薰的首個愛情結晶品前日出世，阿榮匆匆到醫院陪完老婆及等待B仔出世後，晚上又趕回紅館支持Mr.，認真頻撲。


「忍唔住爆喊」
朱薰昨日在電話中說：「囝囝噚晚8點半左右出世，我本來諗住去紅館睇騷，着晒Mr.嘅T恤，臨出門發現唔對路，打畀醫生，佢叫我即刻入院。」朱薰本來想順產，但BB唔啱位，結果要開刀，聽到BB喊聲，她感動到爆喊：「醫生話BB喊得好斯文，我就忍唔住爆喊，老公都眼濕濕。」

朱薰指BB眼睛和面圓圓似自己，嘴仔似老公，昨日第一次試餵人奶，可惜未成功。BB的名字則要跟族譜，她說：「老公姓譚，第一個字要跟族譜用永，有朋友提議叫譚永麟，老公同校長（譚詠麟）講，校長都話好，不過應該唔會真係用。」

前晚Mr.演唱會除了有林德信和Robynn& Kendy擔任嘉賓外，更請來許志安與Mr.合唱兩首歌，安仔恭喜阿榮和朱薰榮升爹哋媽咪，更謂覺得很感動。主音Alan對安仔說：「平時我哋喺廁所見得多，好少機會合唱。我係你嘅super fans，細個同房個同學成日扮你，又成日聽你嘅歌，搞到我都聽埋一份。我失戀時成日聽你啲歌陪自己一日。」安仔笑問：「咁有冇失身？」Alan即表示小時很純潔。另外，Mr.更和台下觀眾合唱一曲《感動》送給阿榮一家三口。

■Alan昨日到醫院探望阿榮及朱薰的囝囝，更影相留念。

■Mr.前晚完成紅館兩場演唱會，榮升伯父的Dash與隊友合唱。

「真係似菇菇」
完騷後阿榮與Mr.一同在後台接受訪問，他表示囝囝重6.8磅，阿榮說：「原本預產期係9號，但今日老婆突然見紅，咁即刻陪佢去急症室，但BB喺肚又未轉頭，經醫生睇過決定開刀生。」由於是急症，故阿榮未能在手術室陪老婆。有否感動到喊？阿榮直言：「喺手術室外等，好緊張，啲眼淚好似倒流咁，真係好amazing。佢下邊真係似菇菇，好搞笑。」他又透露朱薰希望BB的雙眼似爹哋，又謂BB未出世已為他改花名，BB出世後即用花名叫他，B仔竟懂得睜開眼，十分可愛。Tom老婆Leanne及囝囝也有來看騷，Tom笑說：「我一化妝阿仔就好驚訝。」

rivaldo0303

恭喜晒^^

羅渣爸爸

又多位新媽媽~

sa

恭喜

Baby

恭喜晒^^