《天與地》掀金句熱 戚其義鐵定離巢﹕呢個係圓滿句號

talkermama(編輯員)

神劇《天與地》俾無綫擺入雪櫃兩年，至去年先至「出櫃」。初初個個嗌唔明，更因為題材涉及六四，所以俾內地禁播，內地網民要千方百計先有得睇。之後Joe Junior一句﹕「This city is dying‧」大家先至突然覺得……嘩，神劇呀﹗雖然劇集收視一直低迷，但無綫破天荒，於《天與地》播完後，馬上將全套劇擺喺myTV重播一個月，同時又即刻出DVD搵番筆，依家仲賣到斷市。


《天與地》金句極多，隨手數來就有﹕
「和諧唔係一百個人講同一說話，和諧係一百個人有一百句唔同說話之餘，而又互相尊重。」


「大家都只會接受一些偽善嘅人，反而好人，佢哋會驚。」

「香港人最擅長係乜嘢？就係善忘，除咗錢，忘記身邊所有嘅一切，忘記嗰啲舊樓、碼頭，忘記曾經喺街上喊過嘅口號。」

「獨立嘅精神、抗拒建制、自由、愛、勇往直前，其實何止係Rock & Roll，乜我哋做人唔係本來就應該係咁嘅咩？」

「人哋啲大型工會組織，佢哋啲活動就好喇，食蛇宴啦、摘荔枝啦，買啲平價米、平價油咁樣。我哋淨係可以搞家居電器維修興趣班咋。點樣join人呀？仲話join多啲人，心照啦！」

好可惜，戚其義今晚接受訪問時話:「冇諗過會攞，我月底會離開無綫，呢個係圓滿句號。」
就算無綫依家再重播《天與地》，亦換不回一個戚其義，一個周旭明。