M記擺酒3000蚊有找

rivaldo0303

早排有調查話港人搞婚禮平均豪花28萬元，擺酒遇着「貧友」，新人隨時蝕到冇得度蜜月，難怪「港女500」呻做500蚊人情就唔好嚟。查實婚禮豐儉由人，近日網上流傳新人喺麥當勞搞婚禮嘅相，惹嚟港男艷羨目光，大叫：「M記擺酒，係港男嘅夢想。」

查實M記上年開始推出婚禮套餐，最平2,888蚊，最貴係9,999蚊，睇落好似抵過開門利是，但只包場兩粒鐘，未玩新郎就要急急腳走人。婚禮菜單當然係「全包宴」，絕對冇乳豬食，只可以揀豬柳蛋漢堡，當然不設麻雀耍樂，但有蘋果批砌嘅結婚蛋糕，紀念品就係M記膠公仔。




多層蘋果批盒蛋糕

人情套餐價50蚊
前日12.12.12好日子，有10對新人搞M記婚禮，下年開始仲有中式婚禮套餐，加錢就有氣球扭成嘅旗袍畀新娘着，如果唔小心拮爆，唔知會有乜效果呢？

喺M記擺酒，最多人關注係人情問題，有港女話：「梗係做套餐價啦，50蚊畀多佢。」亦有人撐夠創意，值一千……円（約92港元）。

有港男感慨話，如果女友肯去M記擺酒，實在太幸福，仲盛讚：「創新，有風格，創潮流，新一代男人愛死！」港男嘅浪漫想法係：「拍拖喺M記，結婚又喺M記，可見呢段感情從一而終。」

可惜港女唔係咁諗，80後少女小寶寶話：「M記係食快餐嘅地方，擺酒都食快餐，容乜易婚姻都係一場快餐？如果喺M記擺酒，我寧願唔擺囉。」據講佢嘅心聲惹嚟大量港女和應，睇嚟M記婚禮未成氣候，港男仍需努力

rivaldo0303

我諗我最多比$200人情囉

積奇

M記又呃多一條財路     創意無限!!!

AJ (Ace Junior)

Tim

有創意...真係..

彭彭

talkermama(編輯員)

打死都唔會係M記擺酒囉

popopig

真係唔會係M記擺....未接受到= ="
開PARTY玩下就得~