琦姐離港 沉醉拖男友

rivaldo0303

【赤鱲角機場】奧斯卡影后琦溫絲莉（Kate Winslet）嚟咗香港一日幾時間，先後幫新店開張做剪綵嘉賓，之後又去埋馬會頒獎，做完晒手頭工作後就返歸。前晚大約10點，琦姐一身便服同男友Ned Rocknroll喺助手陪同下，搭七人車抵達機場，琦姐同男友繼續恩愛，全程十指緊扣，邊行邊講邊笑，旁若無人，今次Ned再冇好似到港嗰陣阻記者影相，仲笑晒任影唔嬲，不過佢戴住黑超，反而比淡妝嘅琦姐更似明星。





直入禁區
相信係之前助手已經幫佢哋check in，Ned好輕鬆咁一邊拖住琦姐，一邊拉住手提篋，好快就有機場女職員嚟幫佢哋簡單確認，然後唔使排隊由職員通道直行入禁區，琦姐同Ned太沉醉喺自己世界入面，連記者講拜拜都聽唔到。
採訪、攝影：馬建華

■機場職員及工作人員等護送琦姐及其男友。

■貴為奧斯卡影后，琦姐孭着LV手袋，都不算太奢華吧，而其男友則負責拖篋。

■雖然行職員通道入禁區，但琦姐一樣要經安全檢查一關。