今年34歲嘅林嘉欣大前年喺加拿大同導演袁劍偉結婚,同年誕下囡囡Kayla,舊年12月佢出席公開場合時宣佈再懷第二胎生蛇B,預產期係今年5、6月。懷孕後嘅嘉欣甚少出席公開場合,專心留喺家中養胎。
不過嘉欣前日下晝5點半左右,撇甩Kayla同老公,單拖去中環ifc間city'super掃貨,雖然嘉欣個肚未算好大,但體形都暴脹唔少,尤其係個下圍,喺後面睇都幾勁,相信佢生完之後都要好好努力喼弗。
邊行邊休息
嘉欣喺超市行咗一陣就狂掃一大堆食物,當中有麵包、零食等,佢畀完錢就即刻行去停車場攞車,不過嘉欣腹大便便拎住一大袋嘢都好吃力,其間佢都要放低袋嘢休息。
單手拎住成袋重嘢嘅嘉欣去到停車場,見到記者拍照時都好大方揮手同打招呼,之後佢就自己揸車離開。其實大肚嘉欣咁樣拎重嘢真係好易整親腰骨,下次真係要叫埋老公幫手先得。
|