任總之女傳離職 大摩瘦身 手起刀落

藍田猶太人

【明報專訊】魚缸近排成交活躍番小小，但摩根士丹利亞太區今個禮拜初仍然手起刀落玩瘦身，據聞香港係重災區，點重法？探子回報，連金管局前總裁任志剛個女任永欣，都要起身。大摩對於呢單嘢不予置評，但Denise（任永欣洋名）以大摩經濟師喺彭博機註冊嗰個戶口，就冇咗燈（如果個戶口仲生效，一般會着綠燈代表用戶在線，或者紅燈代表用戶離線），而Denise個電話又長期冇人聽，多方面證據都顯示，Denise離開咗呢間投行。

Denise雖然貴為香港前金融沙皇嘅千金，但作風相當低調，外界除咗知道佢係任總個女，同埋係大摩嘅香港經濟師外，所知不多。甚至傳媒都好少拍到佢嘅相。

加入近15年 多名高層齊離職

睇番啲資料，Denise喺1998年加入大摩，以佢今年39歲推斷，Denise就算唔係一畢業就入去大摩，都係投身社會不久，就被大摩招攬麾下，至今已超過14年。

投行瘦身時有所聞，今次Denise「被離職」都算非戰之罪。據講，今次被裁嘅仲有亞洲營運總監、投資銀行石油天然氣部門主管拉康（Saul Raccah），同埋中國房地產投資部門營運總監Leon Guo。不過，以Denise系出名門，人脈甚廣，又係高材生（任總有一次接受訪問時好得意地話兩個子女即包括Denise都係大學一級榮譽畢業，有其父之風），加上咁紮實嘅工作經驗，要搵工可以講冇難度，小琴希望Denise休息下之後，快啲再戰江湖啦！