學友開騷崩牙駒獨唱

rivaldo0303

■學友（左）喺96年6月27日過澳門開騷，崩牙駒被人點唱《男兒當自強》


澳門江湖猛人「崩牙駒」尹國駒日前刑滿出獄，港澳黑白兩道同樣關注。喺澳門回歸前，呢位江湖大佬亦染指娛樂事業，最經典要數96年先後為四大天王張學友同劉德華搞演唱會。

1996年6月27日，學友喺澳門市綜藝場館開騷，場內三千幾個座位晨早爆晒。當晚，駒哥話有人捐咗30萬，邀請佢上台高歌一曲《男兒當自強》，主辦人一聲令下喎，學友拿拿臨讓支咪畀駒哥啦。雖然獻唱途中都有甩歌詞，學友即時音樂導師上身從旁協助，令台下觀眾如癡如醉，大叫「駒哥」、「駒哥」㖭！

駒哥見學友騷咁成功，同年12月食過翻尋味，邀請另一天王華仔過澳門開三場騷。點知去到last嗰晚，駒哥俾警方拘留，胞弟尹國雄惟有代兄出場，上台唱咗首《書劍恩仇錄》，好一句「紅花會豪傑，碧血染蠻夷」，擺明係唱畀葡國人聽。正所謂時移世易，澳門回歸，駒哥亦都回歸，真係唔知幾時再搞番演唱會嘞。

■學友獻唱，崩牙駒喺台下揮動螢光棒，睇得好high。

■96年6月29日《蘋果日報》